Повеќе од 14.000 домаќинства во јапонската префектура Окинава останаа без електрична енергија поради налетот на силниот тајфун Фитоу. Во невремето пет лица се повредени.
Најпогодени се островите Сакишима и Мијако. Брзината на ветрот во некои делови на префектурата достигнала 50 метри во секунда. Брановите во близина на брегот биле високи до 10 метри. Околу 350 авионски летови вчера беа откажани, а над 30.000 луѓе не можеле да отпатуваат. Аеродромот во Окинава денеска повторно е отворен, но дел од летовите и понатаму се откажани.
Според јапонската метеоролошка служба попладне тајфунот ќе се приближи до источнокинеските провинции Чазјан и Фузјан. Се очекува Фитоу да го зафати кинеското крајбрежје утре изутрина. Во очекување на тајфунот Кина објави највисок степен на опасност.
Кон брегот на Окинава се приближува и друг силен тајфун – Данас. Според метеоролозите уште утре вечер тој ќе пристигне до јужните јапонски острови, а кон средина на неделата може да ги погоди островите Кјушу и Хонсју.