Движењето Муслимански браќа утрово соопшти дека најмалку 70 лица загинале кога безбедносните сили отвориле оган врз демонстрантите кои го поддржуваат сменетиот претседател на Египет Мохамед Морси и оти бројот на загинати веројатно е и поголем.
Телевизијата Ал Џазира информираше дека во судирите загинале 120 лица, а повредени се над 4.500.
Претходно беше соопштено дека во судирите загинале 10 лица.
Очевидци тврдат дека полицијата користела гас – солзавец во судирите со демонстрантите. Египетскиот министер за внатрешни работи Мохамед Ибрахим претходно изјави дека од протестите на Муслиманските браќа крај џамијата и покрај каирскиот универзитет нема никаква полза, бидејќи Египет веќе никогаш нема да се врати назад.
Според него, во најскоро време ќе биде ставен крај на нивните демонстрации и „тоа ќе се случи во рамки на законот“.
Претходно, времениот претседател Адли Мансур ги повика членовите на Муслиманското братство да се разотидат и вети дека никој нема да биде процесуиран.
Судири меѓу приврзаниците и противниците на Морси имаше и во Гиза, Мансур, Фајум, Гарбија. Кратки судири имаше и во Шарм ел Шејк, но благодарение на брзата интервенција на бедуинските старешини, страстите се смирија.
Во Луксор спротивставените страни разменија молотови коктели, камења и престрелка. Во безредијата уништени се неколку автомобили.