Москва гo критикуваше планот на Израел да продолжи со изградба на еврејски населби во Источен Ерусалим и на Западниот брег, оценувајќи го потегот како контрапродуктивен, како и дека може да ги усложни израелско-палестинските мировни преговори.
Објавувањето на вакви планови во пресрет на новиот круг преговори, предвиден за 14 август, е контрапродуктивна мерка, објави руското Министерство за надворешни работи.
Според Москва фактот предизвикува сериозна загриженост, бидејќи ваквите дејствија не се во согласност со меѓународното право и не се прифатени од Руската федерација и целата меѓународна заедница.
– Ги повикуваме страните да се воздржат во оваа одговорна фаза од секакви еднострани дејствија, што ја поткопуваат меѓусебната доверба и да преземат соодветни мерки за создавање поволни услови за продолжување на преговорите по сите прашања за конечниот статус, се наведува во соопштението на Министерството, пренесува ИТАР-ТАСС.
Израел за време на викендот објави тендер за прибирање понуди за изградба на 793 станбени единици во Источен Ерусалим и 394 на Западниот брег, непосредно откако минатата недела амерканскиот Стејт департмент објави дека палестинските и израелските мировни преговори ќе продолжат на 14 август во Ерусалим.