Поради незаконските избори, што проруските сепаратисти во неделата ги организираа во источна Украина, има опасност од неуспех на мировните преговори со Москва, изјави новиот висок претставник на Европската унија за надворешна политика и безбедност, Федерика Могерини.
– Главниот ризик денес, според мене, е тоа што ќе се пропушти можноста за внатрешен дијалог, а исто така и за дијалог со Русија за мировниот план што се темели на прогласеното примирје во септември во Минск, рече Могерини.
На средбата на 17 ноември министрите за надворешни работи на 28-те земји од ЕУ ќе ја разгледаат ситуацијата со санкциите на Унијата кон Русија, рече шефицата на европската дипломатија, цитирана од ТАСС.
– Процесот во однос на санкциите ќе продолжи и во следните недели. За 17 ноември е планиран Советот на ЕУ за надворешни работи. Украина со сигурност ќе виде на дневниот ред, посочи Могерини по средбата со генералниот секретар на НАТО Јенс Столтенберг.
Според неа, сега е најважно да се најде решение за мирно надминување на конфликтот во источна Украина.
Неопходно е да се води отворен дијалог со Русија за излез од кризата во источна Украина. Нужна е цврста и решителна реакција на активностите на Москва, со почитување на отворениот дијалог со Русија, подвлече Могерини.