Високата претставничка на Европската унија за надворешна политика и безбедност Федерика Могерини го осуди во вчерашното соопштение сојузот, кој претставниците на Русија го склучија со лидерите на отцепената грузиска област Абхазија.
– Со потпишувањето на т.н. пакт за сојузништво и стратешко партнерство меѓу Русија и Абхазија им се нанесува штета на напорите за стабилизирање на безбедносната ситуација во регионот, порача Могерини.
Таа констатираше дека оваа спогодба претставува кршење на суверенитетот и територијалниот интегритет на Грузија и оти е спротивна на меѓународното право.
НАТО исто така ја осуди спогодбата, а Вашингтон најави дека нема да ја признае оваа постапка на Русија и додаде дека го поддржува суверенитетот на Грузија.
– Т.н спогодба не придонесува за мирно и трајно решавање на ситуацијата во Грузија, нагласи генералниот секретар на НАТО Јенс Столтенберг.
Ахбазија и Јужна Осетија во 2008 година се отцепија од Грузија по кусиот вооружен судир, во кој Русија воено ги поддржа сепаратистите. Освен Русија независноста на овие територии ја признаа и Никарагва, Венецуела и пацифичката држава Науру.
Абхазија со потпишаната спогодба се обврза својата надворешна и безбедноста политика отсега да ја води во тесна координација со Москва.