Италијанската оперска куќа Ла Скала ќе ја отвори новата сезона со изведбата на „Борис Годунов“, руска опера во изведба на руски уметници и нема да има културен бојкот и покрај руската инвазија на Украина.
– Јас не сум за лов на вештерки или за исфрлање на руски дела, изјави за новинарите Доминик Мејер, уметнички директор на театарот.
– Не се кријам додека го читам (рускиот писател Александар) Пушкин. Одлуката за избор на операта е донесена пред неколку години, додаде Мејер.
Главните улоги во операта „Борис Годунов“ напишана од Модест Мусоргски ќе ги играат руските оперски пејачи, басот Илдар Абдразаков и сопранот Ана Денисова.
Почетокот на новата сезона во Ла Скала на почетокот на декември е еден од најважните италијански културни настани.
Веднаш по руската инвазија на Украина во февруари, театарот во Милано објави дека рускиот диригент Валери Гергиев нема да настапи на Скала бидејќи не ја осудил војната.
На прашањето од новинарите која е разликата во споредба со случајот на Гергиев, Мејер рече дека Ла Скала го смета рускиот диригент за своевиден политичар.
– Тој е еден вид руски министер за култура. Другите уметници се во поинаква позиција: добиваат награди и признанија, но тоа не ги прави поддржувачи на војната, додаде тој.
Извор: МИА