Германскиот канцелар Фридрих Мерц смета дека посетата на украинскиот претседател Володимир Зеленски на американскиот претседател Доналд Трамп покажала колку европска помош ѝ е потребна на Украина.
Тој рече дека во петокот вечерта разговарал со Зеленски долго по телефон.
„Посетата не беше она што го сакаше Зеленски. Мислам дека можам да го кажам тоа и тука“, додаде тој за време на граѓанскиот дијалог во Мешеде.
„Европа мора да помогне уште повеќе бидејќи војната може да заврши само ако Украина е воено силна“, рече тој, додавајќи дека ќе работи на поддршка на Украина „финансиски, политички и, се разбира, воено“.
„Капитулацијата на Украина не е опција, бидејќи Русија потоа би ја нападнала следната европска земја“, заклучи тој, според германската n.tv.