Лидерите на Велика Британија, Франција и Германија изразија поддршка за напорите на американскиот претседател Доналд Трамп за прекин на војната во Украина по конференцијата на „коалицијата на добронамерните“ денес. Тие нагласија дека секое решение мора целосно да ја вклучи Украина.
Францускиот претседател Емануел Макрон, британскиот премиер Кир Стармер и германскиот канцелар Фридрих Мерц изјавија дека зазеле јасен став „за принципот дека границите не смеат да се менуваат со сила“, пренесува Ројтерс.
„Ова останува еден од основните принципи за зачувување на стабилноста и мирот во Европа и пошироко“, рекоа тројцата лидери во заедничка изјава.
Порано денес се одржа видеоконференција на „коалицијата на добронамерните“, на која, покрај Макрон, Стармер и Мерц, учествуваа и американскиот државен секретар Марко Рубио, украинскиот претседател Володимир Зеленски, претседателката на Европската комисија Урсула фон дер Лајен и други европски лидери.
Зеленски рече дека Киев е подготвен да го прифати мировниот договор презентиран од Соединетите Американски Држави и дека е подготвен да разговара со американскиот претседател Доналд Трамп за чувствителните точки од планот. Макрон и Стармер изразија подготвеност да подготват финансиска помош за Украина од замрзнатите руски средства.
По конференцијата, фон дер Лајен изјави дека се дискутирале тековните преговори за праведен и траен мир за Украина и го поздрави учеството на американскиот државен секретар Марко Рубио на конференцијата.
„Во последните неколку дена и часови видовме солиден и охрабрувачки напредок. Ни треба силна трансатлантска соработка. Бидејќи таа дава резултати“, рече фон дер Лајен, наведувајќи ги како пример координираните бранови санкции врз руската економија.