Белорускиот претседател Александар Лукашенко предлага главните светски организации, вклучувајќи ги Обединетите нации, ОБСЕ и ЕУ, да воспостават антитерористички фронт.
-Време е државите од светот да се обединат во настојувањата системски да се борат против терористите и нивните соучесници и да отворат широк меѓународен дијалог, рече Лукашенко, пренесен од Тасс.
ОН би требало да има водечка улога во тие напори, нагласи Лукашенко, потсетувајќи дека Белорусија е потписник на сите главни спогодби под закрила на светската организација.
-Убеден сум дека создавањето обединет антитерористички фронт во кој би биле ОН, ОБСЕ, ЕУ Организацијата за договорот за колективна безбедност (ОДКБ), Заедницата на независни држави, Шангајската организација за соработка и други меѓународни организации, е единствениот вистински начин силно и ефикасно да се соочиме со оваа закана, изјави Лукашенко.
Според него, тероризмот стана една од главните закани за глобалната безбедност која нема ни државни ни морални граници, а терористите го користат во своите акции и модерни технологии.