Велика Британија изјави дека стои зад Украина и дека ќе продолжи да ѝ ја обезбедува потребната опрема, по предупредувањето на Русија во врска со обвинувањата дека Украина користи дронови произведени во Велика Британија за напад врз руска територија.
Портпаролот на британското Министерство за одбрана изјави дека Велика Британија „стои рамо до рамо“ со Украина и е посветена да ѝ ја обезбеди потребната опрема за да се одбрани од руски напади, објави Скај њуз.
„Русија не треба да се сомнева во решеноста на оваа влада да се спротивстави на руската агресија, како во Украина, така и против Велика Британија и нашите сојузници“, рече портпаролот.
Руската амбасада во Лондон вчера изјави дека Велика Британија станува помошник и соучесник во „крвавите злосторства и терористички напади“ на Киев откако Украина почна да користи дронови произведени во Велика Британија за напад длабоко во руска територија.
Британските авиони, според весникот „Тајмс“, почнаа да се користат за напади длабоко на руска територија во неделата, пренесува РИА Новости.
„На овој начин, Велика Британија станува помагач и соучесник во крвавите злосторства и терористичките напади на украинските неонацисти, со цел да ја ограничат нашата земја и да предизвикаат максимална штета од рацете на другите“, се вели во соопштението на руската амбасада.
Руската амбасада во Лондон предупреди дека Велика Британија ќе се соочи со последиците од своите постапки.