Рускиот министер за надворешни работи Сергеј Лавров денеска изјави дека Русија го предупредила НАТО дека доколку алијансата или некои нејзини членки дејствуваат агресивно против Москва, рускиот одговор ќе биде адекватен.
„Нашите противници не треба да се залажуваат. Во случај на агресивни дејствија на НАТО или одредени земји-членки против нашата земја, ќе бидат преземени соодветни одмазднички мерки во согласност со Повелбата на ОН, која го гарантира сувереното право на Русија на самоодбрана и употребата на сите средства за да се обезбеди неговата безбедност. И никој нема да може да се скрие ниту преку Атлантскиот Океан, ниту преку Ла Манш“, предупреди Лавров во интервју за РИА Новости.
Лавров рече дека Москва не може, а да не земе предвид дека „НАТО долго време не ја крие својата агресивна политика кон Русија“.
Лавров потсети дека стратегиите на алијансата ја опишуваат Москва како „најзначајна и најдиректна закана за безбедноста“, а раководството на НАТО постојано предупредува за наводните планови на Русија да нападне земја која е дел од алијансата во наредните години.
Во исто време, северноатлантската воена алијанса брзо ја милитаризира Европа, а силите на блокот вежбаат офанзивни операции против Москва, додаде тој.