Британската кралица Елизабета Втора ја откажа денешната посета на Велс поради болест. Претставник на Бакингамската палата соопшти дека кралицата има стомачен вирус проследен со болки, треска и повраќање, поради што мора да остане во кревет.
Во Велс кралицата требаше да присуствува во одбележувањето на денот на Сент Дејвид, светец заштитник на Велс и на Велшаните.
Засега не е познато како 87-годишната кралица се заразила, но лекарите веруваат дека тоа можело да се случи во директен контакт со заразено лице или преку храна и пијалок.
Во четвртокот кога кралицата последен пат беше во јавноста, таа им доделуваше одликувања на британските олимпијци.
Кралицата Елизабета и покрај својата возраст ретко бледува. Сегашниот стомачен вирус може да предизвика да биде откажана и државната посета на Италија идната недела, каде таа и нејзиниот сопруг принцот Филип, треба да бидат гости на италијанскиот претседател Џорџо Наполитано.