Еврокомесарката за проширување Марта Кос денеска изрази уверување дека постои јасна перспектива за отворање на сите преговарачки кластери за пристапување на Украина во Европската Унија до крајот на 2025 година.
Таа на состанокот на Советот за асоцијација ЕУ-Украина изјави дека „проекциите се речиси завршени и имаат јасна перспектива“, се вели во соопштението објавено на веб-страницата на ЕУ.
Кос се надева дека ќе ги отвори првите три кластери од преговорите на Украина со ЕУ за пристапување во Унијата во првата половина на оваа година, за време на полското претседателство, а останатите три до декември.
Кос ја потврди посветеноста на ЕУ за максимално искористување на можностите што ги нуди Договорот за асоцијација за да се олесни постепената интеграција на Украина на единствениот европски пазар, дури и пред пристапувањето.
