Лидерката на израелската Лабуристичка партија Мерав Микаели, која е клучен партнер во израелската владејачка коалиција, денеска изјави дека сите членки работат на одржување на кревката коалиција.
Коалицијата е под притисок поради внатрешните судири и растечкото насилство со Палестинците.
Претходно овој месец, членка на партијата на израелскиот премиер Нафтали Бенет ја напушти владејачката коалиција, оставајќи ја владата без тенко мнозинство во парламентот и можност за нови национални избори по долгогодишен политички хаос.
Пратеничката Идит Силман ја напушти десничарската партија Јамина, предводена од Бенет, и ѝ се приклучи на опозицијата. Таа во писмото за оставка наведе дека клучните вредности во нејзиниот поглед на светот не се совпаѓаат со моменталната реалност.
Осумчлената коалиција, составена од ултранационалисти, умерени партии и мала исламистичка партија, сега има 60 места исто како и опозицијата во 120-члениот Кнесет. Тоа значително ја отежнува способноста на владата да донесува закони и го зголемува ризикот од предвремени избори.
– Ова сигурно е предизвикувачки момент за коалицијата. Политички гледано, има пречки, изјави Микаели, но изрази надеж дека владата ќе опстане.
Микаели, која е и министерка за транспорт, рече дека сите партиски лидери работат заедно за да се изнајде секој можен начин да се спаси владата и да се осигура дека таа ќе продолжи да работи како и досега.
Извор: МИА