Кина ги зголемува своите залихи од нуклеарни боеви глави побрзо од која било друга земја, покажува нова студија. Извештај објавен во понеделник од Стокхолмскиот меѓународен институт за истражување на мирот (SIPRI) проценува дека Кина моментално има најмалку 600 нуклеарни боеви глави, а околу 100 нови се додаваат на залихите секоја година од 2023 година.
На редовната прес-конференција во кинеското Министерство за надворешни работи, портпаролот Гуо Џиакун не го коментираше извештајот, но рече дека „Кина постојано се придржува до стратегијата за нуклеарна самоодбрана“.
– Кина постојано се придржува до стратегијата за нуклеарна самоодбрана, ги одржува своите нуклеарни сили на минималното ниво потребно за националната безбедност и не учествува во трка во вооружување, рече Гуо Џиакун.
Тој додаде дека Кина има политика без прв напад со нуклеарно оружје и никогаш нема да користи или да се заканува дека ќе користи нуклеарно оружје против ненуклеарни држави.
„Кина ќе продолжи решително да ги брани своите безбедносни интереси и да придонесува за одржување на светскиот мир и стабилност“, рече Гуо Џиакун.
Доколку продолжи ова темпо, Кина би можела да има дури 1.500 нуклеарни боеви глави до 2035 година – речиси колку што Русија и САД моментално имаат подготвени за непосредна употреба.
Заедничките залихи на САД и Русија, кои вклучуваат боеви глави кои не се во оперативна употреба, се значително поголеми. Според истражувањето на SIPRI, Русија има 5.459 боеви глави, додека САД имаат 5.177. Заедно, двете земји поседуваат околу 90 проценти од светскиот нуклеарен арсенал, пишува The Guardian.