Кинеската Воена морнарица и Военото воздухопловство почнаа вежби со боева муниција во близина на Корејскиот Полуостров, во момент на зголемени тензии по последните ракетни тестови на Северна Кореја и најавите за развој на нуклеарно оружје.
Местото на одржување на вежбите е област недалеку од источниот брег на Кина во Жолтото Море и Бохајскиот Залив. Испукани се десетици проектили во вежбите што се оквалификувани како „обемни“.
Во нив учествуваат десетици воени бродови, повеќе од 10 авиони, подморница и единици на крајбрежните сили.
Министерството за одбрана на Кина соопшти дека вежбите се наменети за тестирање на оружјето и усвовршување на способноста на армијата во извршување напади во крајбрежни подрачја и пресретнување цели во воздух. Не е наведено до кога ќе траат вежбите иако е дадена четиридневна забрана за пловидба во тоа подрачје.