Портпаролот на кинеското Министерство за надворешни работи, Жао Лијан, денеска ја повика групата Г7 да престане да се меша во внатрешните работи на Кина.
-Позицијата на Кина за Хонг Конг, Синџијанг и Тајван е јасна и конзистентна. Таканаречената заедничка изјава на министрите за надворешни работи на земјите од Г7 ја игнорира нашата позиција и објективни податоци, злонамерно и лажно ја обвинува Кина и претставува мешање во внатрешните работи на нашата земја, изјави Жао, пренесе Тасс.
Според него, Народна Република Кина е многу незадоволна од оваа најава на Г7 и го изразува своето длабоко несогласување.
-Ги повикуваме земјите од Г7 да го отфрлат менталитетот на Студената војна и идеолошките предрасуди и да престанат да се мешаат во внатрешните работи на другите земји, да престанат да повторуваат лаги и да поттикнуваат регионални конфликти, рече Жао.
Министрите за надворешни работи на Г7 минатата недела по средбата на шефовите на дипломатиите во Германија издадоа заедничка изјава со која повикаа на мирно решавање на споровите во Тајванскиот теснец и повторно ја повикаа Кина да се воздржи од закани и евентуална употреба на сила.
Во соопштението на Г7 се наведува дека земјите-членки се загрижени поради извештаите за кршење на човековите права во Кина, вклучувајќи ги Синџијанг и Тибет, како и континуираното кршење на правата, слободите и автономијата на Хонг Конг, пренесоа британските медиуми.
Извор: МИА