Севернокорејскиот лидер Ким Џонг-ун изјави дека главната цел на неговата земја е да ја има најмоќната нуклеарна сила во светот, објавија државните медиуми.
Ким го објави ова на церемонијата на која промовираше неколку десетици офицери вклучени во неодамнешното лансирање на најголемата севернокорејска балистичка ракета, Хвасонг-17. Надгледувајќи го неговото лансирање на 18 ноември, Ким рече дека ќе одговори на американската нуклеарна закана со нуклеарно оружје.
Изградбата на нуклеарна сила служи за заштита на достоинството и суверенитетот на државата и народот, а „главната цел е да се има најмоќната стратешка нуклеарна сила, апсолутна сила без преседан во овој век“, рече Ким.
Тој ја нарече ракетата Хвасонг-17 „најмоќното стратешко оружје во светот“, додавајќи дека тоа ја покажува одлучноста на Северна Кореја и нејзината способност да ја изгради најмоќната војска во светот.
Севернокорејските научници постигнаа „значителен напредок во развојот на технологијата за изградба на нуклеарни боеви глави на балистички ракети“, рече Ким, без да даде детали.
И во таа прилика севернокорејскиот лидер се појави со својата ќерка. Ова е само втор пат тој да се појави во јавноста со неа. Двајцата позираа со војници, научници и други кои учествуваа во овомесечното лансирање на ракетата Хвасонг-17.
Државниот медиум KCNA објави дека толпата била исполнета со безгранична страст и среќа бидејќи изразиле најголема слава и огромна почит кон Ким и неговата ќерка.
„Вистината што ја учи историјата е дека само кога ќе станеме најсилни – а не најслаби – во сегашниот свет, каде што силата во конфронтација одлучува за победата, можеме да ја одбраниме сегашноста и иднината на земјата и нациите“.
Позирајќи за слики со научници, инженери, офицери и други вклучени во тестот, севернокорејскиот лидер рече дека очекува тие да продолжат да шират застрашувачки нуклеарно оружје со неверојатна брзина.
Лансирањето на ракета што може да стигне до нејзина територија ги поттикна Соединетите држави да побараат претседателска изјава од Советот за безбедност на ОН и да ја повикаат Северна Кореја за тестирањето ракети кои се забранети со резолуции на Советот за безбедност.