Американската администрација е подготвена да го продолжи дијалогот со Русија за безбедносните гаранции во Европа, изјави постојаниот претставник на САД во ОБСЕ Мајкл Карпентер.
Тој рече дека руската страна на американската и ја пренела желбата да ги продолжи разговорите за „неделива безбедност“.
– И ние сме подготвени да ги поддржиме тие разговори, рече Карпентер.
На 17 декември 2021 година, Министерството за надворешни работи на Русија објави нацрт-договори со САД за безбедносни гаранции, како и договори за мерки за обезбедување на безбедноста на Русија и земјите-членки на Северноатлантската алијанса.
Документот, меѓу другото, вклучува одредби за меѓусебно нераспоредување на ракети со среден и краток дострел во меѓусебен дострел, откажување од натамошно проширување на НАТО на поранешните советски републики и намалување на бројот на воени вежби.
Преговорите се водеа на почетокот на јануари во три формати: САД-Русија, Советот Русија-НАТО и во рамките на ОБСЕ.
САД потоа доставија одговор до Русија за нејзините предлози за безбедносни гаранции, а руската страна нагласи дека нема одговор за најважното прашање што ја загрижува Русија – натамошното проширување на Алијансата.
Извор: МИА