На Украина, прво и пред се, и е потребен мир, изјави денеска претседателот на Парламентарното собрание на Организацијата за безбедност и соработка во Европа (ОБСЕ), Илка Канерва.
Во обраќањето на 14-та зимска сесија на ПС на ОБСЕ, што започна денеска во Виена со учество на околу 270 пратеници од 56 земји-членки на оваа паневропска организаиција, Канерва ги повика двете страни во украинскиот конфликт да се воздржат од употреба на сила и да прекинат со пролевање крв во источна Украина.
Како што јави Хина, тој изрази надеж дека и украинските сили и проруските сепаратисти целосно ќе ги почитуваат Договорот во Минск, кој меѓу останатото предвидува прекин на огнот, повлекување на тешкото оружје од линијата на фронтот и решавање на разликите по мирен пат.
– Кризата во и околу Украина и неодамнешните терористички напади во Париз и Копенхаген покажуваат дека е неопходно удвојување на напорите за справување со тероризмот, рече Канерва.
Апел за почитување на примирјето во Украина упати и актуелниот претседавач со ОБСЕ, шефот на српската дипломатија Ивица Дачиќ, ков во обраќањето на сесијата ги осуди сите форми на злосторства, омраза, расизам, нетолеранција, антисемитизам и тероризам.
Дачиќ најави и дека ОБСЕ во јуни ќе организира меѓунаордна конференција посветена на борбата против тероризмот.