Австралиската партија „Викиликс“ на Џулијан Асанж, која ќе учествува на изборите за Сенат, денеска се најде во криза откако една од водечките кандидатки ја напушти поради „разочарување од недостигот на демократичност“ во неа.
Лесли Канолд, експерт за етика, беше втор кандидат по ред на партијата „Викиликс“ за сенаторско место, веднаш по Асанж. Доколку оваа партија освои мандат во Парламентот на изборите на 7 септември, Канолд веројатно ќе го заземе местото на Асанж во Сенатот, ако тој не може да се врати во Австралија.
Таа најави дека и други членови ќе ја напуштат партијата. Веднаш по неа тоа го направил и Даниел Метјуз, еден од 11-те членови на националниот совет на партијата „Викиликс“, меѓу кои се и Асанж и неговиот татко Џон Шиптон.
– Се плашам дека моите искуства со оваа партија не се позитивни, истакна Метјуз по напуштањето, кој бил пријател со Асанж уште од факултет, и нагласувајќи дека му е жал што заминува под вакви околности.