Британскиот премиер Дејвид Камерон изјави дека има силни индикации дека вчерашното брутално убиство во Лондон e терористички напад.
Двајца мажи нападнаа војник со сатар во близина на касарна и го убија. Осомничените беа ранети од полицијата, откако пружиле отпор, јави БТА.
На заедничка прес-конференција во Елисејската палата во Париз со францускиот претседател Франсоа Оланд, Камерон го определи убиството како „најужасно злосторство“. Тој додаде дека ќе ја прекине посетата во француската престолнина и ќе се врати во Лондон.
Оланд изрази целосна солидарност со Велика Британија во врска со злосторството.
На видео-материјал емитуван на британската телевизија Ај-ти-ви, двајцата напаѓачи извикувале „Алах е голем“. Според очевидци, тие ја заклале жртвата на најбрутален начин.
По убиството напаѓачите останале во реонот, мавтале со ножевите и огненото оружје и ги повикувале минувачите да ги фотографираат и снимаат.
Други очевидци изјавија дека двајцата мажи се обиделе да ја обезглават жртвата.
На видео материјалот на Ај-ти-ви, едниот од напаѓачите се приближил кон убиениот војник и рекол: „Ние треба да се бориме со нив, како што тие се борат со нас. Око за око, заб за заб“.