Бројот на починати од епидемијата на колера во Јемен достигна 923 лица, јави Светската здравствена организација (СЗО), цитирана од ДПА.
Болеста веќе зафати 20 од 22-те провинции во Јемен, држава што е поделена и девастирана од граѓанската војна. СЗО предвидува дека е можно 124.000 лица да се заразени од колера.
Во мај СЗО прогнозираше дека за шест месеци епидемијата на колера може да зафати и до 300.000 лица. Минатиот месец заради епидемијата во главниот град Сана беше прогласена вонредна состојба.
Епидемијата доаѓа во момент кога половина од здравствените установи во земјата не работат заради војната меѓу владата, поддржана од Саудиска Арабија, и шиитските бунтовници Хуси, кои се подржани од Иран.
Според проценката на ОН, околу 7,6 милиони лица живеат во регионите од Јемен што се зафатени со колера.
Во последните 24 часа епидемијата одзеде уште 64 жртви.