Израелските сили ослободија четворица заложници што ги држеше Хамас од октомври по операцијата во централниот дел на Појасот Газа, додека владината медиумска канцеларија на Газа, која е под контрола на Хамас, соопшти дека 210 Палестинци биле убиени и најмалку 400 ранети во израелските напади врз бегалскиот камп Ал Нусејрат од кој беа земени заложниците.
Во моментов не е јасно дали спасувањето на заложниците и израелскиот воздушен напад биле дел од истата операција, но сето тоа се случило во Ал-Нусеират, густо населена област која често е сцена на борби меѓу Израел и Хамас.
Портпаролот на израелската војска изјави дека операцијата за спасување заложници се одвивала под оган во срцето на станбена населба, каде Хамас ги криел заробениците меѓу цивилите во Газа под стража на вооружени милитанти.
Израелските сили возвратија со оган, вклучително и воздушни напади, додаде портпаролот контраадмирал Даниел Хагари. Еден војник на израелските специјални сили е убиен за време на операцијата, се наведува во соопштението на полицијата.
Тројца мажи и една жена, кои беа киднапирани од музичкиот фестивал Нова во јужен Израел на 7 октомври минатата година од милитантите предводени од Хамас, се пренесени во болница на лекарски преглед, соопшти армијата, додавајќи дека се во добра здравствена состојба.
Нивните имиња се Ноа Аргамани (25), Алмог Меир Јан (21), Андреј Козлов (27) и Шломи Жив (40).
По осуммесечната војна во Газа и крвавиот напад на Хамас на 7 октомври, 116 од околу 250 киднапирани заложници од милитантите, според израелските информации, се уште се во палестинската енклава. Од 250, властите прогласија најмалку 40 мртви во отсуство.
Во исто време, претставници на палестинското Министерство за здравство и локални лекари изјавија дека во напад на израелската војска во Ал-Нусеират загинаа десетици луѓе, меѓу кои и жени и деца. Министерството не соопшти колку борци на Хамас има меѓу загинатите.
Владината медиумска канцеларија под контрола на Хамас објави дека загинале 210 лица, а повеќе од 400 се ранети.
„Беше како во хорор филм, но ова беше вистински масакр. Израелски беспилотни летала и воени авиони пукаа цела ноќ по случаен избор кон куќите на луѓето и кон луѓето кои се обидоа да избегаат од областа“, рече Зијад (45), болничар и жител Ал Нусејрат.
Бомбардирањето се фокусираше на локалниот пазар и џамијата Ал-Авда, изјави тој за Ројтерс преку апликација за пораки.
„За да ослободи четири лица, Израел уби десетици невини цивили“, рече тој.
Нусејрат, историскиот палестински бегалски камп, беше изложен на силно израелско бомбардирање за време на војната, а во источниот дел се водеа жестоки копнени борби.