Израелската армија ги уништи домовите на двајцата главни осомничени за киднапирање на тројца израелски тинејџери, пронајдени мртви во близина на Хеброн, на Западниот брег.
Домовите на Маруан Кауасме и Амер Абу Ејше, членови на Хамас, биле целосно уништени. Израел ја обвини палестинската организација Хамас дека стои зад киднапирањето и убиството на тројцата млади, додека израелскиот премиер изјави дека Хамас ќе плати скапо за тоа.
Израелската армија изршила десетици напади врз воени објекти на Хамас и организацијата „Исламски џихад“ во појасот Газа, јави ДПА.
Според очевидци за помалку од десет минути биле нанесени над 25 удари од воздух. Нема повредени, бидејќи објектите биле евакуирани пред акцијата.
Хамас го обвини Израел дека го користи убиството на тинејџерите како причина за зајакнување на воените дејствија против палестинците. Портпаролот на Хамас ги отфрли сите обвиненија, дека движењето е вмешано во смртта на момчињата.