Продолжуваат жестоките борби во Појасот Газа, објави израелската армија, објавувајќи дека „неколку терористи биле убиени во воздушни напади и копнени судири во текот на претходниот ден“.
Војската објави дека има интензивни борби во Хан Јунис, најголемиот град на јужната крајбрежна територија, а војниците наводно „убиле голем број терористи со прецизен снајперски оган“.
Палестинските медиуми јавуваат дека во петокот вечерта во израелски воздушен напад врз градот Деир ел Балах во Газа загинале најмалку 24 лица.
Палестинската новинска агенција Вафа, повикувајќи се на локални извори, јави дека многумина се повредени и дека спасувачките екипи трагаат по луѓето затрупани под урнатините.
Според здравствените власти, кои се под контрола на Хамас, речиси 30.000 луѓе биле убиени во Појасот Газа, а уште 70.000 биле ранети за време на израелската воена операција.
Меѓународната заедница жестоко го критикуваше Израел за обемот на уништувањето и бројот на цивилни жртви.