Израел е подготвен да им помогне на умерените арапски држави, кои се под закана на екстремистите, изјави денеска шефот на израелската дипломатија Авигдор Либерман на средбата со американскиот државен секретар Џон Кери во Париз.
– Екстремистите кои денес дејствуваат во Ирак се обидуваат да го дестабилизираат целиот регион на Заливот, пред се Кувајт. Израел би можел да предложи ефикасна и конкретна помош на умерените арапски држави, изложени на екстремистичките закани, посочи Либерман без да наведе детали.
Тој истакна дека интересите на Израел се исти со интересите на умерените арапски држави, бидејќи сите се соочуваат со иранската закана, со закана од џихадот и од Ал Каеда.
– Денес има основа за создавање на нова дипломатска и политичка архитектура на Блискиот Исток. Важно е земјите од регионот да формираат заеднички фронт против заканата на Исламска држава во Ирак и Левантот, посочи Кери.