Италијанскиот претседател Џорџо Наполитано го распушти денеска парламентот по оставката на премиерот Марио Монти, со што се отвора патот за предвремени избори во февруари.
Наполитано го потпиша декретот за распуштање на парламентот по консултациите со политичките лидери.
Монти поднесе оставка синоќа, неколку месеци пред истекот на неговиот мандат, откако неговата влада ја загуби парламентарната поддршка од партијата на поранешниот премиер Силвио Берлускони, десноцентристичката Народ на слободата.
Датумот на изборите, најверојатно 24 февруари, треба да биде прецизиран од кабинетот на Монти, кој продолжува да ги извршува своите овластувања како техничка влада.