Руската војска би можела да се обиде да изврши голема офанзива во источна Украина „во нереален рок и веројатно без доволна борбена моќ“, објави денеска американскиот тинк-тенк за безбедност и одбрана Институт за проучување на војната (ISW). Слични предвидувања неодамна објави и британското Министерство за одбрана.
ISW наведува дека голема руска офанзива насочена кон достигнување на западните граници на регионот Доњецк се предвидува веќе неколку недели, но руските сили засега напредуваат многу бавно. Институтот вели дека претстојната „сезона на кал“, во која снегот се топи за да создаде калливи услови на и надвор од патиштата низ Украина, може дополнително да го забави секој значаен напредок на руските сили.
Тие потсетуваат дека бавниот напредок не е единственото нешто што може да ја фрустрира руската воена команда. Тие истакнуваат дека руските воени блогери постојано изразувале загриженост за „неможноста да се одржи брз офанзивен напредок во повеќе насоки во дадената временска рамка“.
„Еден истакнат воен блогер предупреди дека руските сили не треба да паднат во стапицата на започнување на повеќе офанзивни операции како во пролетта 2022 година, туку треба да се фокусираат на постепено напредување“, наведува ISW, потсетувајќи дека истиот блогер објавил и дека „слабеење на Украинските сили треба да бидат приоритет пред да започнат нов напад“.