Иранската влада изјави дека израелскиот напад врз земјата, во кој загинаа неколку ирански генерали, научници и граѓани, докажал дека овој, како што велат, „нелегитимен режим“ не се придржува до никакви меѓународни правила или закони.
Во соопштението се нагласува дека Израел „отворено и дрско се вклучува во терор и ги разгорува пламените на војната пред очите на светот“, вклучувајќи ги и западните земји кои тврдат дека ги почитуваат човековите права и меѓународното право.
„Почнувањето војна со Иран е играње со лавовската опашка. Кукавичката ноќна операција за време на дипломатскиот процес за иранското нуклеарно прашање е знак за стравот на овој режим од моќта на Иран да го убеди светот дека иако ние Иранците никогаш не сме започнале ниту една војна во изминатите 200 години, не сме се двоумеле да ја браниме нашата татковина и нема да го сториме тоа“, се додава во соопштението.
Во соопштението се оценува дека израелската инвазија и „кукавичкиот атентат“ врз иранските генерали докажале дека овој режим е терористички по природа, објави агенцијата ИРНА.
Во него се наведува дека одмаздата на Иран е негово „легитимно право“ и дека Техеран ќе одговори остро на „израелскиот терористички режим кој убива деца“.