Индиската Влада во нов буџет на Индија планира да ги зголеми трошоците за одбрана за 12 отсто во однос на минатата година.
Во буџетот, презентиран денеска, се предвидува поголемо отворање на индиската одбранбена индустрија за странски инвестиции, со цел на вооружените сили на Индија да им се помогне да се засилат и да се надмине доминацијата на Кина.
Во последните три години Индија е најголемиот купувач на оружје во светот, обидувајќи се да го замени своето застарено вооружување од советско време со модерни оружја. Таа, исто така, сака да биде ривал на Кина, со која пред повеќе од половина век водеше војна.
Според индискиот министер за финансии Арун Џајтлеј, воениот буџет за оваа година ќе изнесува 2,29 билиони рупии (38,35 милијарди долари), во однос на ланските 2,04 билиони рупии.
– Модернизацијата на вооружените сили е од клучно значење за да можат тие поефикансо да ја одиграат својата улога за заштита на стратешките интереси на Индија, рече тој пред пратениците во Долниот дом.
Ова е првиот буџет на новата Влада на партијата Баратија џаната, која одамна инсистира на засилување на воената моќ на Индија за да може да ги одбие потенцијалните закани од Кина и Пакистан.