Повеќе од осум илјади демонстранти се собраа на централниот плоштад „Пуерта дел сол“ во Мадрид, повикувајќи за воспоставување република во Шпанија и ставање крај на монархијата, чиј углед е разнишан по серијата скандали изминатите години.
Демонстрантите како и секоја година се обединија под мотото „Долу режимот на монархијата, за Трета република“, одбележувајќи ја годишнината од републиката, прогласена на 14 април 1931 година, која беше проследена со 40-годишната диктатура на Франко по граѓанската војна (1936-1939 година).
Генералот Франсиско Франко го назначи кралот Хуан Карлос за свој наследник на чело на државата, кој ја зазеде таа позиција по смртта на диктаторот во 1975 година.
Популарноста на Хуан Карлос се намали изминатите месеци поради доказите за корупција на неговиот зет Инаки Урдангарин, сопруг на шпанската принцеза Кристина Федерика. Седумдесет и пет годишниот монарх беше критикуван и за учеството во луксузно сафари во екот на финансиската криза во Шпанија.