Во воздушните напади на проамериканската коалиција убиени се најмалку девет цивили во северозападна Сирија, соопшти денеска Организацијата за заштита на човековите права „Хјуман рајт воч“ (ХРВ) и побара истрага за евентуалното кршење на законот за војување.
ХРВ се повикува на сведоштвото на тројца жители на сириското село Кафр Дерјан во покраината Идлиб. Тие преку скајп изјавиле дека „авионските ракети убиле најмалку двајца мажи, две жени и пет деца во вторникот“.
Организацијата признава дека тоа не се официјални информации и оти не може да го провери тврдењето на локалните жители.
– Американската Влада треба да ги испита евентуалните незаконски напади во кои се убиени цивили, јавно да извести за тоа и да се обврзе дека со соодветни мерки ќе обештети за грешките, посочува ХРВ.