Универзитетот Харвард денес поднесе тужба со која ја оспорува одлуката на администрацијата на американскиот претседател Доналд Трамп да му забрани на универзитетот да запишува странски студенти, нарекувајќи ја неуставна одмазда за непочитување на политичките барања на Белата куќа.
Во тужбата поднесена до федералниот суд во Бостон, Харвард изјави дека владината акција го крши Првиот амандман и ќе има „непосредни и катастрофални последици за Харвард и повеќе од 7.000 иматели на визи“, објави АП.
„Со еден потег на пенкалото, владата се обиде да избрише една четвртина од студентското тело на Харвард, меѓународни студенти кои даваат значаен придонес за Универзитетот и неговата мисија“, се вели во тужбата на Универзитетот Харвард.
Универзитетот објави дека планира да поднесе барање за привремена забрана за да се спречи Министерството за национална безбедност да ја спроведе оваа акција.
Харвард запишува речиси 6.800 меѓународни студенти, од кои повеќето се постдипломци и доаѓаат од повеќе од 100 земји.
Американската администрација го обвини Харвард за создавање небезбедна средина со тоа што им дозволува на „антиамерикански, протерористички агитатори“ да напаѓаат еврејски студенти на кампусот.
Тужбата поднесена денес е одвоена од претходната тужба од страна на универзитетот со која се оспоруваат повеќе од 2 милијарди долари намалување на федералните средства наметнати од републиканската администрација.