Синот на американскиот претседател Хантер Бајден денеска пред Комитетот за надзор и правосудство на Претставничкиот дом на САД изјави дека Џозеф Бајден не бил вклучен во неговите работи.
„Денеска сум овде да кажам еден неоспорен факт што треба да стави крај на лажната премиса на оваа истрага: не се мешав со татко ми во мојот бизнис. Не додека бев адвокат, ниту во моите инвестиции или трансакции дома или во странство, не како член на одборот, не како уметник. Никогаш“, изјави Бајден.
Тој ги обвини републиканците за „тргување со инсинуации, искривување на фактите и сензационализам“.
„За цело време ги игнориравте јасните и убедливи докази пред вашиот нос. Немате докази за неосновани заговори за мојот татко“, рече Хантер Бајден.
Синот на американскиот претседател се појави пред комитетите за правосудство и надзор на Претставничкиот дом за да одговори на прашањата за наводите дека Џозеф Бајден лично имал корист и влијаел врз неговите зделки во Кина и Украина додека бил американски потпретседател.
Обидите на републиканците да го поврзат односот татко-син со пошироката истрага за импичмент на Џозеф Бајден пропаднаа претходно овој месец.