Гладот никогаш не смее да се користи „како оружје на војна“, изјави вчера генералниот секретар на ОН, Антонио Гутереш, пренесува АФП.
„Конфликтите продолжуваат да шират глад во Појасот Газа, Судан и пошироко. Гладот ја поттикнува нестабилноста и го поткопува мирот“, рече Гутереш за време на видеоконференција на Самитот на ОН за прехранбени системи во Етиопија.
Тој истакна дека светот „никогаш не смее да го прифати гладот како оружје на војна“, пренесува АФП.
Светската здравствена организација (СЗО) предупреди во неделата дека стапките на неухранетост во Појасот Газа достигнуваат алармантни нивоа, со висока стапка на смртност во јули. Од 74 смртни случаи поврзани со неухранетост регистрирани од почетокот на годината, 63 се случиле во јули, вклучувајќи 24 деца под петгодишна возраст, едно дете над петгодишна возраст и 38 возрасни, соопшти агенцијата на ОН, пренесува Бета.
Две истакнати израелски групи за човекови права изјавија дека нивната земја врши геноцид во Газа, што е прв пат од почетокот на израелската офанзива пред 22 месеци локалните организации предводени од Евреи да упатат такви обвинувања против Израел.