Самитот на Групата 77 и Кина вчера заврши во боливискиот град Санта Круз со повик на учесниците за искоренување на сиромаштијата до 2030 година и предлогот на боливискиот претседател Ево Моралес да се укине Советот за безбедност на ОН.
Договорот кој го постигнаа 133-те членки на Групата 77 подразбира и цели за одржлив развој и национален суверенитет над природните ресурси.
– Искоренувањето на сиромаштијата е најголем проблем со кој се соочува светот, а тоа е потребно за одржлив развој. Тоа мора да остане главна цел и придвижувачка сила на агендата по 205 година, се наведува во соопштението по состанокот и се додава дека „сиромаштијата го нарушува човечкото достоинство“.
Моралес, кој е актуелен претседател на Г-77, порача дека треба да се „елиминираат светските хиерархии“ и повика за укинување на СБ на ОН.
– Советот за безбедност на ОН треба да се елеминира бидејќи поттикнува војни и инвазии од страна на империјалистичките сили, со цел да ги присвојат природните богатства на нападнатите држави, истакна Моралес.
Боливија во завршната декларација од средбата успеа да вметне и дека жвакањето на листот на коката е дел од културното наследство на предците.
Веднаш по доаѓањето на власт во 2006 година, Моралес започна меѓународна дипломатска офанзива за легализација на одгледувањето и употребата на коката. Владата на Моралес бара ова растение да биде исклучено од списокот со наркотични растенија на ОН. Според новиот боливиски Устав од 2009 година, листот на коката е признат за дел од културата на земјата.
На собирот, со кој се одбележува 50-годишнина од основање на Г-77, учествуваа 30 шефови на влади и претставници на повеќе од 100 земји во развој, како и од Кина, што сочинува околу две третини од земјите во светот, со цел да се заложат за поправеден светски поредок.