Илјадници Шпанци денеска демонстрираа ширум земјата, поради големата невработеност, која како што велат е резултат на владината неспособност и корупциските скандали.
Протестите во Мадрид и уште 60 други места ги организираа околу 150 организации, меѓу кои и синдикати од областа на градежништвото, автомобилската индустрија, како и полициската и здравствената служба.
Многумина демонстранти истакнаа пораки против премиерот Маријан Рахоја и владеачката партија Народна партија, за која се поврзани многу истраги поради корупција.
Според наводите на полицијата, во Барселона се собрале околу 20.000 демонстранти, но властите не изнесоа податоци за бројката во Мадрид.
Невработеноста во Шпанија достигна 26 проценти, при што многу студенти и квалификувана работна сила бараат работа во странство.
Претставникот на Генералниот работнички синдикат, Кандидо Мендес изјави дека е јасно дека народот ги отфрли строгите владини мерки за штедење.