Претседателката на Европската комисија, Урсула фон дер Лајен, предупреди дека светот влегува во период на длабоки и трајни геополитички промени, велејќи дека нема враќање кон претходната стабилност на меѓународните односи. Таа го објави ова за време на говорот на Универзитетот Кејо во Токио, каде што ѝ беше доделена почесна докторска титула, како дел од 30-тиот самит ЕУ-Јапонија.
– Не смееме да се залажуваме со надеж дека бурата ќе помине и светот ќе се врати во претходната состојба, рече фон дер Лајен, осврнувајќи се на длабоките глобални превирања предизвикани од неодамнешните конфликти и променливите пристапи на клучните актери на меѓународната сцена.
Таа ги наведе војната во Украина и надворешната политика на американскиот претседател Доналд Трамп како примери за овие промени, кои, според неа, фундаментално ги преобликувале традиционалните сојузи и геополитичките односи.
Фон дер Лајен со тоа испрати предупредување до глобалната политичка и економска елита дека повеќе не може да смета на старите парадигми на стабилност и предвидливост и дека Европската Унија мора да се стреми да ја зајакне сопствената стратешка отпорност во брзо менувачкиот свет.