Преку прераспределување на фондови, Европската Унија ќе обезбеди 2,9 милиони евра за украинските деца кои се наоѓаат во училиштата ширум ЕУ поради војната, јави дописничката на МИА од Брисел.
Ова денеска го најави Европската Комисија. Фондовите доаѓаат од програмата за училишта на ЕУ, чија цел е подобрување на исхраната за учениците во Европа. Од оваа програма се прераспределуваат 2,9 милиони евра за да им се пружа помош на украинските ученици во европските школи.
Програмата од каде се влечат фондовите изнесува вкупно 220,8 милиони евра, од кои над 130 милиони се алоцираат за зеленчук и овошје, а 90,1 милиони за млеко за децата во училиштата.
Европската Комисија бара од земјите членки на ЕУ, кои ја финансираат оваа програма, да ги ревидираат нивните барања согласно политичкиот контекст и нападот на Русија врз Украина за да се олесни товарот врз државите кои примаат украински бегалци.
Комисијата соопшти дека оваа редистрибуција на фондовите ја прави врз основа на барања на земјите членки на ЕУ.
Извор: МИА