Европската унија и Северно-атлантската алијанса (НАТО) изразија силна осуда на терористичкиот напад врз канцелариите на сатиричниот неделник „Шарли ебдо” во Париз, во кој според најновите информации 12 лица го загубија животот.
Како што јавува дописникот на МИА од Брисел, претседателот на Европската комисија Жан-Клод Јункер и генералниот секретар на НАТО Јенс Столтенберг го осудија овој терористички акт од засега непознати лица, нарекувајќи го варварски чин.
– Длабоко сум шокиран од бруталниот и нехуман напад што се случи во канцелариите на списанието „Шарли ебдо”. Ова е недопустливо дело, варварство што не допира сите нас како човечки суштества и Европејци. Моите мисли се со жртвите и нивните семејства во мое лично име и во име на Европската комисија ја изразувам нашата најголема солидарност со Франција,истакна челникот на неформалната Влада на ЕУ, Јункер.
Генералниот секретар на НАТО, Столтенберг исто така силно го осуди терористичкиот напад во канцеларијата на францускиот неделник. Според наследникот на Андерс Фог Расмусен, ова е варварски чин и срамотен напад врз слободата на печатот.
– Моите мисли се со жртвите и нивните семејства. Ние сме во целосна солидарност со нашиот сојузник Франција. Сите НАТО-сојузници стојат заедно во борбата против тероризмот. Тероризмот во сите негови форми и манифестации никогаш не може да се толерира или оправда – гласи пораката на Столтенберг.