Официјалните лица во Еквадор ја разгледуваат можноста од Британија да побараат одобрување за да го префрлат Џулијан Асанж во нивната амбасада во Шведска.
На тој начин Асанж би одговарал по обвинувањата за сексуален напад.
Министерот за надворешни работи на Еквадор, Рикардо Патино изјави дека постојат неколку варијанти за да се реши положбата на Асанж.
„Можно е изјава од Асанж да биде земена во нашата амбасада во Лондон или Еквадор да добие одобрение да го префрли, доколку е потребно, во амбасадата во Шведска. Така случајот би можел да биде продолжен таму под заштита на Еквадор и со тоа би се исполниле барањата на шведското судство“, изјави Патино.
Основачот на Викиликс се наоѓа во амбасадата на Еквадор во Лондон од 19-ти јуни во настојувањето да избегне екстрадиција во Шведска.
Тој тврди дека случајот во Шведска е само дел од заверата да му се суди во САД поради неговата работа во Викиликс.
Шведска и Вашингтон тоа го демантираат.