Египетската Влада соопшти денеска дека е одлучна во намерата да се соочи со „терористичкото делување“ на исламистичкото движење Муслиманско братство, а на полицијата и е наложено да користи боева муниција за да спречи напади врз згради на владата и полицијата.
Во соопштението се наведува дека постои „криминален план да се разорат столбовите на египетската држава“, но дека Владата бара „инклузивен политички процес“ отворен за секој кој не учествува во насилството.
Во исто време, египетското МВР дало налог на сите сили да ја употребат боевата муниција „за да сузбијат каков било напад врз згради или сили на Владата“.
Соопштението на Министерството е издадено откако исламисти, приврзаници на соборениот претседател Мохамед Морси, убија двајца полицајци за време на нападите на полициски пунктови и упаднаа во седиштето на локалните власти во Каиро и го запалија.