Кабинскиот персонал на најголемата британска авионска компанија „Бритиш Ервејз“ (БА) стапува во двонеделен штрајк поради долготрајното несогласување со управата на компанијата околу платите на вработените и нивните бенифиции, соопштија денеска британските синдикати.
Предвидено е штрајкот да почне на први и да трае до 16 јули на полноќ.
Првично, тој требаше да трае четири дена и да почне од денеска, но е одлучено да се остават следните две недели, како временски простор за можно изнаоѓање решение со менаџментот на БА.
Решението за штрајк е донесено откако менаџментот не ја прифати последната понуда на синдикатите, во врска со казнувањето на кабинскиот персонал во компанијата, поради нивното учество во поранешниот штрајк.
Синдикалната управа тврди дека на овие луѓе, а станува збор за 1.400 вработени, не им биле вратени укинатите бенифиции.
Наместо тоа, компанијата има создадено „црна листа“ за казнување на штрајкувачите. За нив нема исплаќање на бонуси, а тие не можат ниту да ги користат разните олеснувања што им следуваат при летањето на долги релации.