Српската кошаркарска репрезентација се подготвува за осминафиналето на Евробаскетот против Финска во Рига, но пред натпреварот се случил сериозен инцидент.
Имено, полицијата добила дојава за бомба во Арената каде што се игра дуелот, поради што е прогласена вонредна состојба.
Целото финале на Евробаскетот се игра во Латвија, а во текот на денот веќе се одиграни три натпревари – Турција ја победи Шведска, Германија ја победи Португалија, додека Литванија беше подобра од домаќинот Латвија.
Непосредно пред натпреварот меѓу Србија и Финска, пред салата е пронајден сомнителен пакет.
Полицијата веднаш реагираше, затворајќи го делот помеѓу медиумскиот центар и Арената и блокирајќи ја целата улица.
Во официјалното соопштение за медиумите, организаторите наведоа: „Полицијата ја блокираше улицата. Ситуацијата може да трае 20 минути. Се извинуваме за непријатностите и ви благодариме за разбирањето. Безбедноста е на прво место“.
И покрај инцидентот, натпреварот меѓу Србија и Финска треба да се одржи според планот.