Египетски демонстранти денеска го нападнаа седиштето на движењето Муслиманско братство во Каиро, еден ден по крвавите судири меѓу приврзаници и противници на претседателот Мохамед Морси.
Демонстрантите влегле во шесткатната зграда во источниот кварт Мокатам. Некои од нив фрлале предмети преку прозорците, а други го изнесувале мебелот. Според очевидци, во зградата не се наоѓале членови на движењето, бидејќи биле претходно евакуирани. Еден од демонстрантите ја извадил таблата на Муслиманското братство од зградата.
Синоќа избувнаа судири меѓу вооружени поддржувачи на Морси, кои се наоѓаа во зградата на движењето, и млади демонстранти кои фрлаа со камења и „молотови коктели“ кон седиштето. Според активисти, најмалку петмина демонстранти загинале во немирите.