Бунтовничките сили во Источна Украина бројат 32.000 лица, од кои 10.000 се руски војници, соопшти украинското Министерство за одбрана.
– До денес 32.400 лица се борат на територија на Донбас. Меѓу 6.000 и 10.000 од нив се војници од руските вооружени сили, а другите се платеници од странство и локални жители, изјави претставникот на Генералштабот на украинската армија Олександр Розмазнин.
– Во изминатите денови се убиени 299 руски војници, а 190 се ранети во борби во реонот на аеродромот во Доњецк, каде со месеци се водат жестоки судири, додаде тој.
Меѓу платениците најмногубројната група е составена од Чеченци, верни на претседателот на таа република во рускиот Кавказ Рамзан Кадиров, по кои следат руските козаци, истакна Розмазнин.
Освен Руси, украинската армија заробила платеници од Израел, Србија, Шпанија, Италија и дури од Бразил, рече претставникот на украинскиот Генералштаб. Неговите изјави не можат да се потврдат од независен извор.