Бројот на нелегални влегувања во Европската унија се зголемил за 70 отсто меѓу јануари и септември во споредба со истиот период во 2021 година, достигнувајќи го највисокото ниво од 2016 година, објави денеска Европската агенција за гранична и крајбрежна стража Фронтекс.
Според агенцијата, во првите девет месеци од годинава биле пријавени 228.240 нелегални влезови, од кои 33.380 во септември.
Западнобалканската рута сè уште е најчесто користена, со 106.396 мигранти кои влегле во земјата во првите девет месеци, што е за 170 отсто повеќе во однос на истиот период минатата година, се вели во соопштението на агенцијата.
Оваа рута најмногу ја користат сириски, авганистански и турски мигранти. Бројот на мигрантите кои пристигнале преку источномедитеранската рута во истиот период се зголемил за 118 отсто, а Централниот Медитеран за 42 отсто.