Шпанската полиција во рамките на акцијата „Небок“ уапси 15 членови на организирана криминална група, меѓу кои и Срби, за милионски грабежи во провинциите Аликанте, Кастелон и Валенсија, пишува шпанскиот портал „Ел Паис“.
При апсењето кај осомничените е пронајден накит вреден над 900.000 евра. Уапсените се обвинети и за кражба на вреден накит од познат шпански фудбалски тренер.
Полициската акција беше спроведена кога припадниците на Цивилната гарда претресоа четири куќи во Валенсија, Кастелон и Аликанте и уапсија 15 осомничени, меѓу кои Срби, Хрвати, Босанци и Чеси, под сомнение дека извршиле неколку спектакуларни грабежи.
– Членовите на бандата, од кои повеќето се од земјите на поранешна Југославија, се осомничени за серија грабежи во кои е украдена стока вредна милион евра. Тие се осомничени дека ограбувале низ цела Шпанија, користејќи лажни документи и дека меѓу нивните жртви има и некои познати јавни личности од оваа земја – се вели во текстот.