Авион на „Рајанер“ кој се подготвуваше да полета за Фаро во Португалија се удри во камион за гориво на аеродромот во Единбург во Велика Британија, принудувајќи ги сите патници да бидат евакуирани. Инцидентот се случи утрово додека патниците веќе беа во авионот чекајќи полетување, пишува GB News.
Еден од патниците го опиша моментот на несреќата за „The Scottish Sun“:
„Беше страшно, пилотот се вклучи на интерфонот и се обиде да се преправа дека не е толку сериозно како што изгледаше“.
Тој додаде: „Тукушто почна да се движи и се движеше кон пистата кога се удри во резервоарот за гориво“.
Портпаролот на аеродромот во Единбург потврди дека имаше „инцидент“, но ги негираше наводите за пожар. Тој нагласи дека инцидентот не влијаеше на редовниот проток на сообраќај на аеродромот.
Шкотската противпожарна и спасувачка служба потврди дека добија извештај откако „авион се судри со камион за гориво“ и дека едно возило е во состојба на готовност додека противпожарните екипи на аеродромот се справуваа со ситуацијата.
Од „Рајанер“ разјаснија што се случи.
„Овој лет од Единбург до Фаро се подготвуваше за полетување кога врвот на крилото дојде во контакт со кабината на камионот за гориво“, се вели во соопштението.
„Патниците се симнаа нормално и беше договорен авион за замена за да го изврши овој лет до Фаро“.
Ова не е прв ваков инцидент за „Рајанер“. Порано овој месец, беше објавен извештај од Одделот за истрага на воздушни несреќи, во кој се открива дека авион на „Рајанер“ со речиси 190 лица во него претрпе значителна штета откако се судри со бариера на аеродромот „Станстед“ во Лондон.